Uturo Muritu

Mwarĩ wa maitũ tiga gwĩtigĩra wamona ĩĩ

Hau tũkinyĩte twĩrerete na thĩna

Kuma twathutũkania ya kũrĩa na ya ikũmbĩ ĩĩ

Noguo ngĩa na mũigua ciamenyire kũmatha

Kũrĩa na kũnyua twatũirio nĩ ngogoyo ya igwa ĩĩ

Ĩreragĩra rũkũ-inĩ na ĩkaya kũigana

Ndingĩenda kũririkana thĩna twarerirwo naguo ĩĩ

Matũigĩte na ndogo ta riiko rĩa ngũ njigũ

(Wa Karani)

Maitũ Wairimũ athire na ũtukũ ta munĩko ĩĩ

Mwengũ na rigitũ ciarigicanĩire ũthoni

Akĩrwo athiĩ na mbura yuure ĩmũrinde makinya ĩĩ

Mbarĩ ya Mũngai Ũkabi nĩ mũhũnu mũtu

Gĩathĩa njenga maitũ athire ta aikio na kĩano ĩĩ

Tũgĩtigwo na baba na mwarĩ wa maitũ

Tũgĩtigwo gũtirĩ ũngĩarutire ũngĩ riiko ĩĩ

Baba ndatũrũmbũyagia atũraga kwa ngatha

Tondũ rũthuko rũnungaga rũrĩ kĩnya-inĩ ĩĩ

Baba akundĩte hĩa igĩrĩ agambaga ta nduthi

Mahĩtanirie na mũthuri ũmwe warĩ wa itũũra ĩĩ

Mũthuri ũcio arĩ ngati thakame ĩrĩa njũru

Inegene na mbĩtĩka kwarĩ gĩcanjama ĩĩ

Baba akĩgũtha mũthuri igũtha rĩa kĩũrago

Ciira wacirwo baba akĩohwo njeera mĩaka ĩtandatũ ĩĩ

Tũgĩtigwo riũa-inĩ na mwarĩ wa maitũ

Twatigirwo gĩcagi kĩa ndũrĩka cia mũng’etho ĩĩ

Kũrĩa ũũgĩ wa arũme wakĩgĩrĩire igeca

Campaign ya ũũru wa baba yekirwo nĩ atumia ĩĩ

Athuri a kanitha tondũ nĩ anyuaga kari

Makĩhakana njeera baba witũ ahũrwo ĩĩ

Atwarirwo thibitarĩ atekwĩigua

Rĩkiuma ngo-inĩ riboti ĩgĩũka baba ndarĩ ho ĩĩ

Ona ndarekirwo arĩkie kĩoho kĩrĩa ohirwo

Mũndũ arĩ gũkuithia ithe no Ngai ũrĩ bata nake ĩĩ

Nĩndamenyire atĩ nyũmba itirĩmanagĩra

Rĩrĩa baba akuire kwagĩire njege cia munĩko ĩĩ

Ingĩ nĩ broker njũru njũkĩ mwaria njarie

Ũtonga wothe wa baba wa mbũri na ng’ombe ĩĩ

Mĩgũnda na mburoti ciendirio kĩmungunyo

Tũkĩrwo tũthiĩ biũ kũu tũtirĩ na wako ĩĩ

Tũkĩrwo tumĩre bara tũgethe maitũ

Harĩa thũ ĩikagio ti ho ĩgũaga nĩtwathire ĩĩ

O karĩma tũkagũa tũgĩethaga maitũ

Tondũ kuma atũtiga ndaigana narĩ kwĩhũgũra ĩĩ

Marakara manene merirwo nĩ mũtino

Ngai nĩarũmbũyagia wothe ũrĩa ũmũkayagĩra ĩĩ

O na tũtonete maitũ tũkĩona wĩra

Mũtiga mwahũ akoraga igima nĩtwagĩire indo ĩĩ

Maitũ ũrĩ o harĩa ũrĩ ũmenye no tũragwetha

(Woi! Wa Karani ithe wa Wacira)